කියුබාවට එරෙහි ඇමරිකානු බලපෑම් වලට පෙරටුගාමික්ගේ විරෝධය…
ඇමරිකා එක්සත් ජනපද පාලන තන්ත්රය කියුබාවේ හිටපු ජනාධිපති රාවුල් කස්ත්රෝට එරෙහි අභූත චෝදනා ඉදිරිපත් කරමින්, වෙනිසියුලාවේ ජනාධිපතිවරයා පැහැරගැනීම හරහා සිදුකරනු ලැබූ ප්රජාතන්ත්රවිරෝධී භාවිතය කියුබාවේත් අභ්යාස කිරීමට සූදානම් වන බව පෙනේ. ඇමරිකා එක්සත් ජනපද අධිරාජ්යවාදය විසින් ස්වෛරී රාජ්යයන්ට, වර්තමානයේදී විශේෂයෙන් කියුබා ජනරජයට එරෙහිව බලපෑම් කිරීමේ මෙවලම් ලෙස දේශපාලන චෝදනා, නීතිමය බලපෑම් සහ ප්රචාරක මෙහෙයුම් අඛණ්ඩව භාවිත කිරීම පෙරටුගාමී සමාජවාදී පක්ෂය දැඩිව හෙළා දකී.
කියුබාවේ විප්ලවීය නායකත්වය සහ එහි රාජ්ය ආයතන ඉලක්ක කර ගැනීම, දශක ගණනාවක් තිස්සේ පැවති එ.ජ. අධිරාජ්යවාදී ප්රහාර, ආර්ථික සම්බාධක සහ ක්රමානුකූලව කියුබාව අස්ථාවර කිරීමේ උත්සාහයන්ගේ පුළුල් ඓතිහාසික සන්දර්භය තුළ තබා වටහා ගත යුතුය. මෙම ක්රියාවන්, එ.ජ. නායකත්වය දෙන ගෝලීය ධනේශ්වර ආධිපත්යයේ රාමුවෙන් පිටත ස්වාධීන සංවර්ධන මාවතක් තෝරා ගන්නා ඕනෑම රටකට දඬුවම් කිරීම අරමුණු කරගත් අඛණ්ඩ උපායමාර්ගයක කොටසකි.
මෙලෙස අයුතු ලෙස මැදිහත්වීමේ ප්රතිපත්ති සාධාරණීකරණය කිරීම සඳහා ඉතිහාසය සාවද්ය ලෙස අර්ථකථනය කිරීම සහ දේශපාලන අරමුණු සහිතව චෝදනා ඉදිරිපත් කිරීම අපි ප්රතික්ෂේප කරමු. එවැනි භාවිතයන් රාජ්යයන් අතර ස්වෛරී සමානාත්මතාව, රටක අභ්යන්තර කටයුතුවලට වෙනත් රටවල් මැදිහත් නොවීම සහ යම් රටක ජනතාවට තමන් පිළිබඳ තීරණ අයිතිය ඇතුළු මූලික ජාත්යන්තර එකඟතා උල්ලංඝනය කරයි.
ඇමරිකා එක්සත් ජනපදය විසින් පනවන ලද දැඩි බාහිර බලපෑම් සහ දිගුකාලීන ආර්ථික සීමාවන් මධ්යයේ වුවද, කියුබානු විප්ලවය අධිරාජ්යවාදී ආධිපත්යයට සහ නව ලිබරල් සූරාකෑමට එරෙහි ප්රතිරෝධයේ සංකේතයක් ලෙස තවදුරටත් පවතී. එහි නායකත්වය නීත්යානුකූල නොවන බව හැඟවීමට ගන්නා උත්සාහයන්, කෙටියෙන් කිවහොත් කියුබානු ජනතාවගේ දේශපාලන අභිලාෂයන් දුර්වල කිරීමට සහ ඔවුන්ගේ ඓතිහාසික ජයග්රහණ ආපසු හැරවීමට ගන්නා උත්සාහයන් වේ.
කියුබානු ජනතාවට තම ස්වෛරීභාවය රැක ගැනීමට, දේශපාලන ක්රමය තීරණය කිරීමට සහ බාහිර බලපෑම්වලින් තොරව තමන්ගේම අනාගතය තෝරා ගැනීමට ඇති අයිතිය ආරක්ෂා කර ගැනීම සඳහා ගෙන යන අරගලයට පෙරටුගාමී සමාජවාදී පක්ෂය සිය පූර්ණ සහයෝගීතාවය ප්රකාශ කරයි.
එසේම, ආර්ථික, දේශපාලනික, මිලිටරි හෝ මතවාදී යන ඕනෑම ආකාරයක එ.ජ. අධිරාජ්යවාදී ආක්රමණයන්ට එරෙහි විරෝධය තීව්ර කරන ලෙසත්, සාමය, සමානාත්මතාව සහ ජාත්යන්තරවාදයේ ප්රතිපත්ති ආරක්ෂා කරන ලෙසත් ලොව පුරා සිටින ප්රගතිශීලී, සමාජවාදී සහ ප්රජාතන්ත්රවාදී ව්යාපාරවලින් අපි තවදුරටත් ඉල්ලා සිටිමු.
එ.ජ. අධිරාජ්යවාදයට එරෙහි අරගලය සියලු විප්ලවවාදී බලවේගයන්ගේ ප්රධාන කාර්යයක් ලෙස පවතී. ඉතිහාසය රඳා පවතින්නේ ආධිපත්යය පටවන්නන් සමඟ නොව, ඊට එරෙහිව සටන් වදින ජනතාව සමඟය.
මධ්යම කාරක සභාව පෙරටුගාමී සමාජවාදී පක්ෂය
2026 මැයි 24
